அடம்பிடிக்காமல் விட்டுக் கொடுத்துள்ளோம்: திருமாவளவன்

கூட்டணித் தலைமைக்கு ஒத்துழைப்பு கொடுக்க வேண்டும் என்பதற்காக "நடுக் கண்டம் எனக்கு' என்று அடம்பிடிக்காமல் தொகுதி பங்கீட்டில் விட்டுக் கொடுத்துள்ளோம் என்று விடுதலைச் சிறுத்தைகள் கட்சியின் தலைவர் தொல்.திருமாவளவன் தெரிவித்துள்ளார்.

 இது குறித்து செவ்வாய்க்கிழமை அவர் வெளியிட்ட அறிக்கை:
 குறைந்தது 15 தொகுதிகளில் போட்டியிட்டால்தான் தேர்தல் ஆணையத்தின் அங்கீகாரத்தைப் பெறும் அளவுக்கு வெற்றி பெற முடியும் என்பதால் 15 தொகுதிகளை விடுதலைச் சிறுத்தைகள் கட்சி கோரியது. இது எமது தகுதிக்கு மீறியதாகவோ, அடாவடித்தனமான கோரிக்கையாகவோ யாரும் கருதிவிட முடியாது.
 234 தொகுதிகளிலும் எங்களுக்கு வாக்கு வங்கி இருப்பதை 2006, 2009 தேர்தல்களில் உறுதிப்படுத்தியுள்ளோம். "வட மாவட்டங்களில் மட்டும்' அல்லது "தென் மாவட்டங்களில் மட்டும்' என்று ஒரு பகுதி சார்ந்த கட்சியாகவோ, ஒரு சமூகம் சார்ந்த கட்சியாகவோ இல்லாமல் அனைத்துத் தரப்பு மக்களும் அங்கம் வகிக்கும் கட்சியாக விடுதலைச் சிறுத்தைகள் கட்சி வளர்ந்துள்ளது.
 ஏமாற்றம்: இந்நிலையில் தி.மு.க. கூட்டணியில் 10 தொகுதிகளை மட்டுமே பெற முடிந்ததை ஓர் ஏமாற்றமாக கருதுவதில் தவறு இருக்க முடியாது. நெருக்கடியான நேரங்களில் தி.மு.க.வுக்கு உறுதுணையாக இருந்ததால் வீண்பழிகளுக்கும், அவதூறுகளுக்கும் ஆளானவர்கள் நாங்கள். லாப-நஷ்ட கணக்கு பார்க்காமல் அரசியலில் நட்புக்கு புதிய இலக்கணமாகச் செயலாற்றி வருகிறோம்.
 எனவே, தி.மு.க.வுடன் தோழமையுடன் கூடிய ஒரு எதிர்பார்ப்பை கொண்டிருப்பதில் தவறென்ன இருக்க முடியும்? எனினும், இப்போதுள்ள சூழலில் நடைமுறை சாத்தியக் கூறுகளைக் கணக்கில் கொண்டு கூட்டணித் தலைமைக்கு ஒத்துழைக்க வேண்டும் என்பதற்காக விட்டுக் கொடுத்து இந்த உடன்பாட்டுக்கு வந்துள்ளோம். "நடு கண்டம் எனக்கு' என்று அடம்பிடிக்காமல் மற்றவர்களுக்கும் பகிர்ந்தளிக்க வேண்டும் என்ற உயர்ந்த உள்ளத்தோடு உடன்பாடு கண்டு அரசியலில் நம்பகத் தன்மைக்கு அடையாளம் விடுதலைச் சிறுத்தைகள் என்பதை நிலைநாட்டும் வகையில் இந்த முடிவை மேற்கொண்டுள்ளோம்.
 பெற்ற 10 தொகுதிகளிலும் எங்களை தமிழக மக்கள் வெற்றி பெற வைப்பார்கள். தி.மு.க. மீண்டும் ஆட்சியைத் தக்க வைத்துக் கொண்டது என்ற வரலாற்றை உருவாக்குவோம். விடுதலைச் சிறுத்தைகள் கட்சியின் சார்பில் போட்டியிட விரும்புவோர் மார்ச் 10-ம் தேதிக்குள் விருப்ப மனுக்களை அளிக்கலாம் என்று திருமாவளவன் கேட்டுக் கொண்டுள்ளார்

அமைச்சர்களுக்கு தேர்தல் ஆணையம் தடை

தேர்தல் தேதி அறிவிக்கப்பட்டதைத் தொடர்ந்து, நடத்தை நெறிமுறைகள் அமலுக்கு வந்துள்ளன. இதையடுத்து, எந்த விதமான புதிய திட்டங்களையும் அறிவிக்கக் கூடாது என தேர்தல் ஆணையம் தடை விதித்துள்ளது.

 இதுகுறித்து, தமிழக தலைமைத் தேர்தல் அதிகாரி பிரவீன் குமார் செவ்வாய்க்கிழமை வெளியிட்ட உத்தரவு:
 தமிழக சட்டப் பேரவைத் தேர்தலுக்கான தேதி அறிவிப்பு மார்ச் 1-ம் தேதி வெளியிடப்பட்டுள்ளது. இதனால், தேர்தல் நடத்தை நெறிமுறைகள் உடனடியாக அமலுக்கு வருகின்றன. இதைத் தொடர்ந்து, அமைச்சர்கள், பிற உயர் பதவியில் உள்ளவர்கள் நிதி உதவி குறித்த திட்டங்களை அறிவிக்கக் கூடாது.
 திட்டங்களுக்கான அடிக்கல்லை நாட்ட வேண்டிய அவசியம் இருப்பின் அதை அதிகாரிகள் செய்ய வேண்டும். சாலை வசதி, குடிநீர் வசதி போன்ற எந்த வாக்குறுதிகளையும் அளிக்கக் கடாது.
 அரசுத் துறைகள், பொதுத் துறை நிறுவனங்களில் பணி நியமனத்துக்கான உத்தரவுகளை அளிக்கக் கூடாது. தேர்தல் தொடர்பான பணிகளுக்கு அரசு இயந்திரத்தை பயன்படுத்தக் கூடாது என்று பிரவீன் குமார் தனது உத்தரவில் தெரிவித்துள்ளார்

தொகுதிப் பங்கீடு: சோனியாவுடன் தமிழக காங்கிரஸ் குழு ஆலோசனை

தொகுதிப் பங்கீட்டில் திமுக உறுதியுடன் இருக்கும் நிலையில், அடுத்த கட்ட நடவடிக்கை குறித்து அகில இந்திய காங்கிரஸ் கட்சியின் தலைவர் சோனியா காந்தியுடன் அந்தக் கட்சியின் தொகுதிப் பங்கீட்டு குழு தில்லியில் செவ்வாய்க்கிழமை ஆலோசனை நடத்தியது.

 திமுகவுடன் தொகுதிப் பங்கீடு குறித்து பேச்சு நடத்துவதற்காக மத்திய அமைச்சர்கள் ப. சிதம்பரம், ஜி.கே. வாசன், காங்கிரஸ் செய்தித் தொடர்பாளர் ஜெயந்தி நடராஜன், தமிழ்நாடு காங்கிரஸ் கமிட்டி தலைவர் கே.வீ. தங்கபாலு, காங்கிரஸ் அகில இந்தியச் செயலாளர் ஜெயக்குமார் ஆகியோரைக் கொண்ட ஐவர் குழுவை கட்சி மேலிடம் அமைத்தது.
 துணை முதல்வர் க. ஸ்டாலின், திமுக நாடாளுமன்றக் குழு தலைவர் டி. ஆர். பாலு, அமைச்சர்கள் ஆர்க்காடு வீராசாமி, துரைமுருகன், பொன்முடி ஆகியோரைக் கொண்ட திமுக குழுவினருடன் பிப்ரவரி 20-ம் தேதி காங்கிரஸ் ஐவர் குழுவினர் முதல் கட்டமாக பேச்சு நடத்தினர்.
 அப்போது 80 தொகுதிகள், ஆட்சியில் பங்கு, குறைந்தபட்ச செயல் திட்டம், கூட்டணி ஒருங்கிணைப்பு குழு ஆகிய கோரிக்கைகள் காங்கிரஸ் தரப்பில் முன் வைக்கப்பட்டதாகவும், இதனை ஏற்றுக் கொள்ளாத திமுக 53 தொகுதிகள் மட்டுமே தரமுடியும் என்று கூறியதாகவும் தெரிகிறது.
 பிப்ரவரி 23-ம் தேதி தில்லியில் காங்கிரஸ் தலைவர் சோனியா காந்தியை ஐவர் குழுவினர் சந்தித்து திமுகவுடனான பேச்சுவார்த்தை விவரங்களை தெரிவித்தனர். அதனைத் தொடர்ந்து பிப்ரவரி 25-ம் தேதி திமுகவுடன் ஐவர் குழுவினர் 2-ம் கட்டமாகப் பேச்சு நடத்தினர்.
 அப்போது ஆட்சியில் பங்கு, 75 தொகுதிகள் என்பது காங்கிரஸ் சார்பில் மீண்டும் வலியுறுத்தப்பட்டுள்ளது.
 இதனை நிராகரித்த திமுக 53-க்கு மேல் தர வாய்ப்பில்லை என்று கூறியதாக தெரிகிறது. அந்த நேரத்தில் அண்ணா அறிவாலயத்தில் இருந்த முதல்வர் கருணாநிதியை ஐவர் குழுவினர் சந்திக்காமல் சென்றது இதனை உறுதிபடுத்துவது போல இருந்தது.
 இதனிடையே, கூட்டணி விஷயத்தில் குட்டக் குட்ட குனியக் கூடாது. சுதந்திரமாக சுயமரியாதையுடன் திமுக முடிவெடுக்க வேண்டும் என்று திராவிடர் கழகத் தலைவர் கி. வீரமணி திங்கள்கிழமை (பிப்ரவரி 28) வெளியிட்ட அறிக்கை பரபரப்பை ஏற்படுத்தியது. வீரமணி மூலம் தங்களை மிரட்டுவதாக தமிழக காங்கிரஸ் தலைவர்கள் கொந்தளிக்க ஆரம்பித்தனர்.
 இந்நிலையில் காங்கிரஸ் ஐவர் குழுவினர் தில்லியில் செவ்வாய்க்கிழமை காங்கிரஸ் தலைவர் சோனியா காந்தியை சந்தித்து திமுகவுடன் நடைபெற்ற 2-வது கட்ட பேச்சுவார்த்தை விவரங்களை தெரிவித்தனர். அப்போது சோனியா காந்தியின் அரசியல் ஆலோசகர் அகம்மது படேல், தமிழக காங்கிரஸ் பொறுப்பாளர் குலாம்நபி ஆசாத் ஆகியோர் உடனிருந்தனர்.
 சோனியா-சிதம்பரம் தனியாக ஆலோசனை: இதனிடையே, தமிழக சட்டப் பேரவைத் தேர்தல் குறித்து மத்திய உள்துறை அமைச்சர் ப. சிதம்பரத்துடன் காங்கிரஸ் தலைவர் சோனியா காந்தி தனியாக ஆலோசனை நடத்தினார். செவ்வாய்க்கிழமை நடைபெற்ற காங்கிரஸ் ஐவர் குழுவின் சந்திப்புக்குப் பிறகு இந்த ஆலோசனை நடைபெற்றது. ஏப்ரல் 13-ல் தமிழக சட்டப் பேரவைக்கு தேர்தல் நடைபெறவுள்ள நிலையில் திமுகவுடனான தொகுதிப் பங்கீட்டில் தொடரும் இழுபறி குறித்து இருவரும் விவாதித்ததாக காங்கிரஸ் வட்டாரங்கள் தெரிவித்தன.
 திமுக கூட்டணியில் பாமகவுக்கு 31, விடுதலைச் சிறுத்தைகள் கட்சிக்கு 10, இந்திய யூனியன் முஸ்லிம் லீக் கட்சிக்கு 3 என ஒதுக்கப்பட்டுள்ளதாலும், குறைந்தது 140 தொகுதிகளில் திமுக போட்டியிட விரும்புவதாலும் காங்கிரஸ் எதிர்பார்க்கும் தொகுதிகள் கிடைப்பதில் சிக்கல் நீடிப்பதாகக் கூறப்படுகிறது.
 ஆனாலும், ஆட்சியில் பங்கு, 75 தொகுதிகள் என்பதில் காங்கிரஸ் உறுதியாக இருப்பதாக அக்கட்சி வட்டாரங்கள் தெரிவிக்கின்றன.

 இழுபறி இல்லை
 ""தொகுதி பங்கீடு குறித்து திமுகவுடன் நடைபெற்ற பேச்சுவார்த்தை விவரங்களை சோனியா காந்தியிடம் எடுத்துக் கூறினோம். அடுத்த கட்ட பேச்சுவார்த்தையில் சுமுகமான முடிவு ஏற்படும். அடுத்த கட்ட பேச்சுவார்த்தை தில்லியிலா அல்லது சென்னையிலா என்பதை சோனியா காந்தி அறிவிப்பார். திமுகவுடனான தொகுதிப் பங்கீட்டில் இழுபறி ஏதுமில்லை'' என்று செய்தியாளர்களிடம் கே.வீ.தங்கபாலு தெரிவித்தார்.

யாருக்கு ஆதரவு? பழ. நெடுமாறன்

தமிழகத் தேர்தலில் எந்தக் கட்சிக்கு ஆதரவு அளிப்பது என்பது குறித்து எங்கள் இயக்கத்தினரிடம் கருத்துக் கேட்டு வருகிறேன். தஞ்சை, திருத்தணி உள்ளிட்ட பல பகுதிகளில் ஆலோசனை கூட்டங்கள் நடத்தி இதுபற்றி விவாதித்துள்ளோம். யாருக்கு ஆதரவு என்பதை விரைவில் அறிவிப்பேன் என்றார்.

திமுக அணி ஒதுக்கீடு ஓரிரு நாளில் முடியும்

 திமுக அணியில் தொகுதிப் பங்கீடு ஓரிரு நாள்களில் முடிந்துவிடும் என்று தெரிகிறது. சட்டப்பேரவைத் தேர்தலுக்கான திமுக கூட்டணியில் பா.ம.க.வுக்கு 31, இந்திய யூனியன் முஸ்லிம் லீக் கட்சிக்கு 3, விடுதலைச் சிறுத்தைகள் கட்சிக்கு 10 தொகுதிகள் ஒதுக்கப்பட்டுள்ளன. இந்த அணியில் மீதி 190 தொகுதிகள் உள்ளன. காங்கிரஸ் கட்சி 90 தொகுதிகளைக் கேட்டுக் கொண்டிருப்பதாகக் கூறப்படுகிறது. அதனாலேயே இன்னும் தொகுதிகள் எண்ணிக்கை முடிவாகாமல் உள்ளது. கடந்த 25-ம் தேதி நடந்த இரண்டாம் கட்டப் பேச்சில் தொகுதி எண்ணிக்கை முடிவாகும் என எதிர்பார்க்கப்பட்டது. ஆனால் முடிவு ஏதுமின்றி காங்கிரஸ் ஐவர் குழுவினர் சென்றுவிட்டனர். திமுக தரப்பில் தில்லியில் பேசிக் கொள்வதாக தெரிவிக்கப்பட்டதால் பேச்சில் முட்டுக்கட்டை ஏற்பட்டது என அப்போது தெரிவிக்கப்பட்டது. இருந்தாலும் தில்லியில் காங்கிரஸ் தலைவர் சோனியாவைச் சந்திக்க முயற்சி எதுவும் நடப்பதாகத் தெரியவில்லை. இதற்கிடையில் ஆட்சியில் பங்கு இல்லாமல் திமுகவை ஆதரிக்கத் தேவையில்லை என தமிழ்நாடு காங்கிரஸ் முன்னாள் தலைவர் ஈ.வி.கே.எஸ். இளங்கோவன் கூறியுள்ளார். காங்கிரஸின் நெருக்குதலுக்குப் பணிய வேண்டாம் என்ற ரீதியில் திராவிடர் கழக தலைவர் கி. வீரமணி திங்கள்கிழமை வெளியிட்ட அறிக்கை அரசியல் வட்டாரத்தில் அனைவரின் கவனத்தையும் ஈர்த்துள்ளது. திமுக தலைவரின் எண்ண ஓட்டம் தெரியாமல் வீரமணி இப்படி ஒரு கருத்தை தெரிவித்திருக்க மாட்டார் என்பதே அதற்குக் காரணம். காங்கிரஸ் கட்சியினர் தங்கள் பலத்தை அறிந்து தொகுதி எண்ணிக்கையைக் கேட்கவில்லை; மாறாக ஒவ்வொரு தலைவரின் அணிக்கும் குறிப்பிட்ட அளவு என்பதை மனதில் வைத்துக் கொண்டு தொகுதிகளைக் கேட்கிறார்கள் என்று திமுக தரப்பினர் வருத்தம் தெரிவிக்கின்றனர். ""மக்களவைத் தேர்தலில் 15 தொகுதிகளில் 8 தொகுதிகளில் மட்டுமே காங்கிரஸ் கட்சியால் வெற்றி பெற முடிந்தது. அதிலும் 3 தொகுதிகள் இழுபறியில்தான் வெற்றி பெற முடிந்தது என்பதை மறந்துவிட்டு காங்கிரஸ் கட்சியினர் பேசுகின்றனர்'' என்பது திமுக தலைவர்களின் கருத்தாக உள்ளது. கொடுப்பதற்கு தொகுதிகள் இல்லாத சூழ்நிலையில் கூடுதல் தொகுதி வேண்டும் என்று கேட்டு இன்னும் இழுத்துக் கொண்டிருந்தால் இந்தக் கூட்டணி மீது மக்களின் நன்மதிப்பு குறைந்துவிடும் என திமுகவினர் அச்சம் தெரிவிக்கின்றனர். அதனால்தான் காங்கிரஸின் நெருக்குதலுக்குப் பணிய வேண்டாம் என்ற வீரமணியின் அறிக்கை வந்திருக்கிறது என்பது அரசியல் பார்வையாளர்களின் கருத்தாக உள்ளது. காங்கிரஸ் தலைவர்கள் சிலரும் தங்களுக்கு இப்போதைய சூழ்நிலையில் வேறு வழியில்லை என்று கூறுகின்றனர். அதிமுக தரப்பிலும் கூட்டணி கட்சிகள் முடிவாகிவிட்ட நிலையில், தாங்கள் எதிர்பார்க்கும் அளவுக்குத் தொகுதிகள் அங்கு கிடைக்காது என்று கூறுகின்றனர். ஆட்சியில் பங்கு என்பதை திமுகவிடம் வேண்டுமானால் வலியுறுத்தலாமே தவிர, ஜெயலலிதாவிடம் அதைப் பற்றிப் பேசவே முடியாது என்றும் குறிப்பிடுகின்றனர். எனவே மீதம் உள்ள 190 தொகுதிகளில், 2006 அளவில் திமுகவுக்கு ஒதுக்கியது போக மீதி சுமார் 60 தொகுதிகள் கிடைக்கும். அந்த அளவில் காங்கிரஸ் தொகுதிகளைப் பெற்றுக் கொண்டு கூட்டணி ஒப்பந்தத்தில் கையெழுத்திடுமா அல்லது வேறு வாய்ப்புகளைப் பரிசீலிக்குமா என்பது ஓரிரு நாள்களில் முடிவாகிவிடும் என்று இரு தரப்பினரும் கூறுகின்றனர். அதிமுக அணியில் தொகுதிப் பங்கீடு மார்ச் முதல் வாரத்தில் முடிந்து, விரைவில் ஜெயலலிதா பிரசாரத்தைத் தொடங்கிவிடுவார் என எதிர்பார்க்கப்படுவதால், திமுக அணியிலும் தொகுதிப் பங்கீட்டை விரைவாக முடிக்க முயற்சி மேற்கொள்ளப்படுகிறது என்று கட்சி வட்டாரங்கள் தெரிவிக்கின்றன. 

விடுதலைச் சிறுத்தைகளுக்கு 10 தொகுதிகள்

சட்டப்பேரவை தேர்தலில் திமுக கூட்டணியில் விடுதலைச் சிறுத்தைகள் கட்சி 10 தொகுதிகளில் போட்டியிடுகிறது. இதற்கான ஒப்பந்தம் தி.மு.க. - விடுதலைச் சிறுத்தைகள் கட்சிகள் இடையே திங்கள்கிழமை ஏற்பட்டது. இதன் மூலம் வரும் தேர்தலில் தி.மு.க. அணியில் விடுதலைச் சிறுத்தைகள் கட்சி இடம்பெறுவது உறுதியாகியுள்ளது. விடுதலைச் சிறுத்தைகள் கட்சியின் தலைவர் தொல். திருமாவளவன், பொதுச் செயலாளர் ரவிக்குமார், செய்தித் தொடர்பாளர் வன்னி அரசு ஆகியோர் முதல்வர் கருணாநிதியை சென்னை அண்ணா அறிவாலயத்தில் திங்கள்கிழமை இரவு சந்தித்துப் பேசினர். இந்த சந்திப்பின்போது துணை முதல்வர் மு.க. ஸ்டாலின் மற்றும் துரைமுருகன், ஆர்க்காடு வீராசாமி, பொன்முடி ஆகிய தி.மு.க. நிர்வாகிகளும் உடனிருந்தனர். சுமார் 30 நிமிடங்கள் நடந்த இந்தச் சந்திப்பின்போது, விடுதலைச் சிறுத்தைகள் கட்சிக்கு 10 பேரவை தொகுதிகளை ஒதுக்குவது என ஒப்பந்தம் ஏற்பட்டது. ஒப்பந்தத்தில் கருணாநிதியும், திருமாவளவனும் கையெழுத்திட்டனர். இது குறித்து பின்னர் திருமாவளவன் செய்தியாளர்களிடம் கூறியதாவது: தி.மு.க. அணியில் விடுதலைச் சிறுத்தைகள் கட்சிக்கு 10 சட்டப்பேரவை தொகுதிகளை ஒதுக்குவது என்று ஒப்பந்தம் ஏற்பட்டுள்ளது. எங்கள் கட்சிக்கு 25 தொகுதிகளை ஒதுக்க வேண்டும் என்று தி.மு.க. தலைமையிடம் எழுத்துப்பூர்வமாக கோரிக்கை வைத்தோம். பின்னர் பேச்சுவார்த்தையின்போது 15 தொகுதிகளை அவசியம் ஒதுக்க வேண்டும் என்று வலியுறுத்தினோம். இப்போது 10 தொகுதிகளை ஒதுக்கியுள்ளார்கள். கூட்டணிக்கு தலைமை வகிக்கும் தி.மு.க.வுக்கு நாங்கள் நெருக்கடி கொடுக்க விரும்பவில்லை. எனவே, இந்தத் தொகுதிகளை திருப்தியுடன் ஏற்றுக் கொள்கிறோம். தி.மு.க. அணியின் வெற்றிக்கு எங்கள் கட்சித் தொண்டர்கள் முழு ஒத்துழைப்பு அளிப்பார்கள். நாங்கள் போட்டியிடும் தொகுதிகளில் எங்களுக்கென ஒரு தனிச் சின்னத்தில் போட்டியிடுவோம் என்றார் திருமாவளவன். கடந்த தேர்தலில்: கடந்த 2006 சட்டப்பேரவை தேர்தலில் அ.தி.மு.க. அணியில் இடம்பெற்றிருந்த விடுதலைச் சிறுத்தைகள் கட்சி 9 தொகுதிகளில் போட்டியிட்டு, மங்களூர், காட்டுமன்னார்கோயில் ஆகிய 2 தொகுதிகளில் மட்டும் வெற்றி பெற்றது

குட்டக் குட்ட குனியக்கூடாது: தி.மு.க.வுக்கு கி. வீரமணி வேண்டுகோள்

கூட்டணி விஷயத்தில் குட்டக் குட்ட குனியாமல் சுதந்திரமாக முடிவெடுக்க வேண்டும் என்று திமுகவுக்கு திராவிடர் கழகத் தலைவர் கி. வீரமணி வேண்டுகோள் விடுத்துள்ளார்.
இது குறித்து திங்கள்கிழமை அவர் வெளியிட்ட அறிக்கை:முதல்வர் கருணாநிதியின் தலைமையில் 5-வது முறையாக நடைபெற்ற திமுக ஆட்சியில் கருவறை முதல் கல்லறை வரை அனைத்துத் தரப்பு மக்களும் பயன்பெற்றுள்ளனர். சமதர்ம சகாப்தத்தை நிலைநாட்டும் ஒப்பற்ற ஆட்சி கடந்த 5 ஆண்டுகளாக நடைபெற்று வருகிறது.தசரதனிடம் கைகேயி வரம் பெற்றதாக ராமாயணக் கதையில் வரும் நிகழ்வைப் போல, தோழமை உணர்வு காட்ட வேண்டிய சில கட்சிகள், தோள் மீது சவாரி செய்ய முயல்கின்றன. மிரட்டல் பாணி ஆயுதங்களைக் கையில் எடுத்துக் கொண்டு, கற்பனைக் குதிரைகள் மீது சவாரி செய்வது போன்ற நிபந்தனைகளை ஏற்படுத்தினால் அதற்கு திமுக இணங்க வேண்டியதில்லை.திமுக தேர்தல் கால நெருக்கடிகளைச் சந்திக்கும் கட்சி மட்டும் அல்ல. அரசியல் நெருக்கடி கால நெருப்பாற்றில் நீந்தி வந்த ஜனநாயக பீனிக்ஸ் பறவையாகும். தமிழ் மக்கள் திமுக பக்கம் உள்ளனர். தன்னிகரற்ற சாதனைகள் அதன் பலம். கட்டுப்பாட்டோடு பட்டிதொட்டியெல்லாம் படர்ந்துள்ள இயக்கம் இது. தி.மு.க.வின் பண்பாடு, மனிதநேயம், கண்ணியம் ஆகியவை கட்சிக்கு பலவீனமாகி விடக் கூடாது. குட்டக் குட்ட குனியும் போக்குக்கு திமுக ஆட்பட்டு விடுமோ என்கிற அச்சம் தமிழ் இன உணர்வாளர்களுக்கு ஏற்பட்டுள்ளது. இந்நிலையில் தேவையற்ற கூடுதல் பாரத்தை இறக்கிவிட்டு, நிரந்தர சுமைதாங்கியாக ஆகாமல் சுயமரியாதையுடன் முடிவெடுக்க வேண்டும்.நட்பு பேசிக் கொண்டே கசப்பும், வெறுப்பும் மேலோங்கும் இரட்டை நிலைப்பாட்டை ஏற்றுக் கொண்டு களத்தில் இறங்குவது யாருக்கும் நல்லதல்ல. கூட்டணி அரசியலில் நான் உமி கொண்டு வருகிறேன், நீ நெல் கொண்டு வா. ஊதி ஊதி தின்போம் என்ற போக்கு நியாயமாகுமா?1980-ல் இப்படி விட்டுக் கொடுத்து கெட்டுபோன பழைய வரலாறு திரும்ப வேண்டாம். எனவே, திமுக சுதந்திரமாக முடிவெடுக்க வேண்டும் என்று கி. வீரமணி வேண்டுகோள் விடுத்துள்ளார்.தில்லி அதிர்ச்சி!
புது தில்லி: கூட்டணி தொடர்பாக தி.மு.க.வுக்கு வேண்டுகோள் விடுத்து திராவிடர் கழகத் தலைவர் கி.வீரமணி விடுத்துள்ள அறிக்கை, தி.மு.க. தரப்பு சொல்லி வெளியிடப்பட்டதாக இருக்குமோ என்ற கருத்து தில்லி காங்கிரஸ் வட்டாரத்தில் நிலவுகிறது.தி.மு.க., காங்கிரஸ் கூட்டணி பேச்சுவார்த்தை இன்னும் முடிவுறாத நிலையில் மூன்றாவது தரப்பில் இருந்து இதுபோன்ற அறிக்கை வெளியாகி இருப்பது காங்கிரஸ் மேலிடத்தை கடும் அதிர்ச்சிக்குள்ளாக்கி இருக்கிறது.தங்களுடனான உறவை முறித்துக் கொண்டு தனியாகப் போட்டியிடத் தி.மு.க. தயாராகிவிட்டதோ என்ற சந்தேகம் காங்கிரஸ் கட்சிக்கு எழுந்துள்ளதாகத் தெரிகிறது.இதனிடையே, "முதல்வர் கருணாநிதி சொல்லித்தான் வீரமணியின் அறிக்கை வெளியாகி உள்ளது' என மாநில காங்கிரஸ் முன்னாள் தலைவர் ஈ.வி.கே.எஸ்.இளங்கோவன் உள்ளிட்ட பல்வேறு மூத்த காங்கிரஸ் பிரமுகர்கள் தெரிவித்தனர்.